فرحة الطفل “عبد المسيح” واسرته بعد صدور حكم البراءة من تهمة سرقة 5 ارغفة عيش ببنى سويف

“ابنى أخد خمسة أرغفة فعلاً بس مسرقش، وهيسرقهم إزاى وابنى بيشتغل عندهم فى المخبز، كل العمال فى “الفرن” بياخدوا العيش اللى عايزينه، هكذا لخصت مريم عيسى” والدة الطفل عبد المسيح عزت عزيز 9 سنوات والذى يقيم هو وأسرته الفقيرة بمدينة الفشن جنوب المحافظة قصة حكم إيداعه و2 من أصدقائه مؤسسة الأحداث فى تهمة سرقة الخبز.
وحكت والدة الطفل القصة الكاملة لـ”اليوم السابع”، قائلة: “من حوالى سنة وسبع شهور، لقينا مركز الشرطة باعتلنا، توجهنا له وإحنا مستغربين من الاستدعاء، أول ما دخلت لقيت ابنى واقف على جنب واستفسرت عن سبب حضوره، أبلغونى إن صاحب المخبز اللى شغال فيه ابنى عامل محضر واتهمه فيه بسرقة 170 رغيفًا بما يعادل 8 جنيهات، استغربنا من الاتهام، وقولناله أكيد أنت غلطان وقصدك على حد تانى، لكن “عيد” صاحب المخبز أصر على أقواله، وصمم أن المحضر يمشى “وبعدها رحنا للنيابة وهناك قلنا إن المحضر هيتحفظ ومتقلقوش من أى حاجة بعد ما وكيل النيابة سمع لأقوال الطفل، وقال له روح”.
وتستكمل الأم كلامها: “من أسبوعين فوجئنا بإنذار جاى على منزلنا ولما سألنا اكتشفنا إن القضية بتاعته لسه شغالة واتحكم عليه فيها بالإيداع فى مؤسسة رعاية الأحداث لصغر سنه لمدة عام، ورحنا للنيابة والمحامى عمل الاستئناف واتحدد لها جلسة اليوم، وتدخل ولاد الحلال فى الموضوع وراحوا لصاحب المخبز واقنعوه بعمل محضر تصالح والتنازل عن القضية، وحكم القاضى بالبراءة”.
“عبد المسيح عزت” الطفل الذى حكمت عليه محكمة جنايات الأحداث فى عام 2013 غيابيًا بالايداع فى مؤسسة عقابية لمدة عام، دون علم أسرته أو إخطارهم من المحكمة بإنذار، حصل اليوم الخميس على براءة من نفس المحكمة فى الاستئناف المقدم لها من محامى الطفل على الحكم تحدث ببراءة الأطفال حاكيًا القصة قائلاً: “أنا مأخدش إلا خمس أرغفة فقط، وأخدتهم عادى زى أى حد من عمال الفرن بياخد الخبز، ولقيتهم حطوا طاولة الخبز كلها على “تروسيكل المخبز” وحطونى معاها وخدونى على المركز”
اما عم عزت والد الطفل 40 سنة لا يعمل وكان يمتلك عربة حنطور يصرف بها على إخوته ووالدته مريم عيد فوزى ربة منزل ولا تعمل ولديه ثلاثة أشقاء الأكبر مينا 19 سنة ومارينا 15 سنة وماريا 4 سنوات، تحدث قائلاً: أشكر الرب على براءة ابنى وأخدته معايا للبيت، وخلاص مش هسيبه يشتغل عند حد تانى” معبرًا عن سعادته ببراءة نجله من تهمة لم يرتكبها، ولو فعلها فهو طفل ماذا يعلم فى حياته أو دنيته عن السرقة، عشان نتهمة بالاتهام ده.
وكانت محكمة جنح الطفل (مستأنف الأحداث) قررت برئاسة المستشار فوميل لبيب، رئيس المحكمة، وأمانة سر عبد العاطى عبد المجيد تحت رقم 58 لسنة 2012 تسليم الطفل عبد المسيح عزت عزيز 9 سنوات إلى ذويه برفقة طفلين آخرين فى واقعة سرقة خبز أحد المخابز وقررت المحكمة إلغاء الحكم الصادر من محكمة الطفل غيابيًا بإيداعه دور الرعاية الاجتماعية.